Poletikers un ehr Kledåschen
Klein Mittel Groß

Poletikers un ehr Kledåschen

Plattdeutsche Gedanken von Behrend Böckmann

Vörbi sünd dei Tieden, dat ’n sik blot œwer denn Haut vonne Queen un denn Blazer von Mama Merkel ünnerhölt un dorœwer sinniert, worüm dei ein nie nich Büxen un dei anner ümmer Büxen drächt. Ne, dei Bunten fangen nu an, dei Mannslüüd inne Poletik neeger tau bekieken.

Taun Bispill sall Heiko Maas dei besten Antöch drägen. Hei is in Gägensatz tau Gauck kathoolsch, hett sik süss œwer ’n Ogenspeigel an em nåhmen. Hei läwt trennt von sien Fru un sien twei Kinner un hett 'n Liäsong mit ’n Schauspälerin. Martin Schulz, ok kathoolsch, œwer åhn Liäsong. un wenn dei Ratschläch ihrlich dacht sünd, wür hei åhn Bort noch bäder för dei SPD „punkten“. Putin hüll dat mit sien Fru nich mihr ut un is af 2014 as Einspänner ünnerwägens, un lött sik hier un dor mit 'n nåkelt Bost aflichten. Hei hett kein düütsche Vöröllern as Trump, dei dormit ja düchtig angifft, œwer noch mihr mit sien drüdde Fru Melania von ’n Balkan, sien Pöll up’n Kopp, denn roden Binner un dei Stimm'.

Disse vier Mannslüd un ehr Kledaschen künn man sik taun Ogenspeigel för ’n Quartettspill nähmen. Hett einer denn all vier in'n Antoch mit Binner orrer mit 'n nåkelt Bost bi'n Morgenlop tauhop, denn kann hei sien Quartett afleggen. Por erotische Quartetts sünd ok dorbi: man kann ümmer ein Quartett afleggen, wenn man dei vier Mannslüd in ’n Slip, Boxershort, Hipster, Schlüpper mit Bein, amerikansch Hemdbüx, lange Ünnerbüxe, String orrer Stripper-Pants ut witten Bio-Fienripp orrer kolorigen Kattun inne Hand hett. Un wat öllere Dåmen dorbi dörch ’n Kopp geiht, dat künn inne Bunten ståhn. Sei termaudbarsten sik denn Kopp, ob dei Poletikers Ünnerbüxen von Calvin Klein, David Beckham, Hugo Boss orrer anner Modemåker orrer wecker in’n Sixpack ut’e Grabbelbox bi’n Diskaunter köpen.

Un bi’t Afleggen geiht denn dei Ökelie wieder.

Sünd dei düütschen Polerikers bi deu 90 Purzent Mannslüd, dei dei Ünnerbüx egål is un dei antrecken, wat henlecht ward? Bi Putin sorgen dei kneilangen von Dynamo Moskau för denn nödigen Spijök. Un woans künn dat anners sien, bi Trump sünd dat dei Hemdbüxen mit Knopleist vörn un Noorsklapp achtern, so as dei ein un anner sei noch ut’n Care-Paket von nå 45 kennt. Un denn blieben noch tau besnacken: Ünnerbüxen mit un åhn Ingriff, Boxer, dei updrägen un Slips taun angäben, ob’n Kierl jeden Dach dei Ünnerbüxen wesseln mœt, Ünnerbüxen as Slåpantoch un Inlågen för ’n Knackpo.

OZ

Voriger Artikel Nächster Artikel

Mehr zum Artikel

Benjamin Barz Ostsee-Zeitung Ostsee-Zeitung Umfrage, Meinung, Teaser der den User auf die Seite "Umfragen" führen soll image/svg+xml Image Teaser „Umfragen“ 2015-09-23 de MEINUNG Aktuelle Umfrage Ihre Meinung zählt: Geben Sie ein Votum ab zu aktuellen Themen aus Politik, Wirt- schaft und anderen Gebieten. Alle Umfragen auf einen Blick finden Sie hier.